குருடிமலை

பாடல் 613
தனன தனதன தனன தனதன 
தனன தனதன ...... தனதான 

கருடன் மிசைவரு கரிய புயலென 
கமல மணியென ...... வுலகோரைக் 

கதறி யவர்பெயர் செருகி மனமது 
கருதி முதுமொழி ...... களைநாடித் 

திருடி யொருபடி நெருடி யறிவிலர் 
செவியில் நுழைவன ...... கவிபாடித் 

திரியு மவர்சில புலவர் மொழிவது 
சிறிது முணர்வகை ...... யறியேனே 

வருடை யினமது முருடு படுமகில் 
மரமு மருதமு ...... மடிசாய 

மதுர மெனுநதி பெருகி யிருகரை 
வழிய வகைவகை ...... குதிபாயுங் 

குருடி மலையுறை முருக குலவட 
குவடு தவிடெழ ...... மயிலேறுங் 

குமர குருபர திமிர தினகர 
குறைவி லிமையவர் ...... பெருமாளே.