ஸ்ரீ சைலம் திருமலை

பாடல் 523
ராகம் - பிலஹரி ; தாளம் - ஆதி 
(எடுப்பு - 1/2 இடம்) 

தனதன தனதன தனதன தனதன 
தனதன தனதன ...... தனதான 

ஒருபது மிருபது மறுபது முடனறு 
முணர்வுற இருபத ...... முளநாடி 

உருகிட முழுமதி தழலென வொளிதிகழ் 
வெளியொடு வொளிபெற ...... விரவாதே 

தெருவினில் மரமென எவரொடு முரைசெய்து 
திரிதொழி லவமது ...... புரியாதே 

திருமகள் மருவிய திரள்புய அறுமுக 
தெரிசனை பெறஅருள் ...... புரிவாயே 

பரிவுட னழகிய பழமொடு கடலைகள் 
பயறொடு சிலவகை ...... பணியாரம் 

பருகிடு பெருவயி றுடையவர் பழமொழி 
எழுதிய கணபதி ...... யிளையோனே 

பெருமலை யுருவிட அடியவ ருருகிட 
பிணிகெட அருள்தரு ...... குமரேசா 

பிடியொடு களிறுகள் நடையிட கலைதிரள் 
பிணையமர் திருமலை ...... பெருமாளே.