மயிலம்

பாடல் 546
தனதந்த தானன தானா தானா 
தனதந்த தானன தானா தானா 
தனதந்த தானன தானா தானா ...... தனதான 

கொலைகொண்ட போர்விழி கோலோ வாளோ 
விடமிஞ்சு பாதக வேலோ சேலோ 
குழைகொண்டு லாவிய மீனோ மானோ ...... எனுமானார் 

குயில்தங்கு மாமொழி யாலே நேரே 
யிழைதங்கு நூலிடை யாலே மீதூர் 
குளிர்கொங்கை மேருவி னாலே நானா ...... விதமாகி 

உலைகொண்ட மாமெழு காயே மோகா 
யலையம்பு ராசியி னூடே மூழ்கா 
வுடல்பஞ்ச பாதக மாயா நோயா ...... லழிவேனோ 

உறுதண்ட பாசமொ டாரா வாரா 
எனையண்டி யேநம னார்தூ தானோர் 
உயிர்கொண்டு போய்விடு நாள்நீ மீதா ...... ளருள்வாயே 

அலைகொண்ட வாரிதி கோகோ கோகோ 
எனநின்று வாய்விட வேநீள் மாசூ 
ரணியஞ்ச ராசனம் வேறாய் நீறா ...... யிடவேதான் 

அவிர்கின்ற சோதிய வாரார் நீள்சீ 
ரனலங்கை வேல்விடும் வீரா தீரா 
அருமந்த ரூபக ஏகா வேறோர் ...... வடிவாகி 

மலைகொண்ட வேடுவர் கானூ டேபோய் 
குறமங்கை யாளுட னேமா லாயே 
மயல்கொண்டு லாயவள் தாள்மீ தேவீழ் ...... குமரேசா 

மதிமிஞ்சு போதக வேலா ஆளா 
மகிழ்சம்பு வேதொழு பாதா நாதா 
மயிலந்தண் மாமலை வாழ்வே வானோர் ...... பெருமாளே.