சோமீச்சுரம்

 பாடல் 870

ராகம் - மாண்ட் 
தாளம் - சதுஸ்ரத்ருவம் - கண்டநடை (35) 
(எடுப்பு - /4/4/4 0) 

தனனதன தனனதன தானான தானதன 
தனனதன தனனதன தானான தானதன 
தனனதன தனனதன தானான தானதன ...... தனதான 

கரியகுழல் சரியமுகம் வேர்வாட வாசமுறு 
களபமுலை புளகமெழ நேரான வேல்விழிகள் 
கயல்பொருது செயலதென நீள்பூச லாடநல ...... கனிவாயின் 

கமழ்குமுத அதரவிதழ் தேனூறல் பாயமிகு 
கடலமுத முதவியிரு தோள்மாலை தாழவளை 
கலகலென மொழிபதற மாமோக காதலது ...... கரைகாணா 

தெரியணுகு மெழுகுபத மாய்மேவி மேவியிணை 
யிருவருட லொருவரென நாணாது பாயல்மிசை 
யிளமகளிர் கலவிதனி லேமூழ்கி யாழுகினு ...... மிமையாதே 

இரவினிடை துயிலுகினும் யாரோடு பேசுகினும் 
இளமையுமு னழகுபுனை யீராறு தோள்நிரையும் 
இருபதமு மறுமுகமும் யானோத ஞானமதை ...... யருள்வாயே 

உரியதவ நெறியில்நம நாராய ணாயவென 
ஒருமதலை மொழியளவி லோராத கோபமுட 
னுனதிறைவ னெதனிலுள னோதாய டாவெனுமு ...... னுறுதூணில் 

உரமுடைய அரிவடிவ தாய்மோதி வீழவிரல் 
உகிர்புதைய இரணியனை மார்பீறி வாகைபுனை 
உவணபதி நெடியவனும் வேதாவும் நான்மறையு ...... முயர்வாக 

வரியளிக ளிசைமுரல வாகான தோகையிள 
மயிலிடையில் நடனமிட ஆகாச மூடுருவ 
வளர்கமுகின் விரிகுலைகள் பூணார மாகியிட ...... மதில்சூழும் 

மருதரசர் படைவிடுதி வீடாக நாடிமிக 
மழவிடையின் மிசையிவரு சோமீசர் கோயில்தனில் 
மகிழ்வுபெற வுறைமுருக னேபேணு வானவர்கள் ...... பெருமாளே.