கழுகுமலை

பாடல் 632
தனன தனதனா தனத்த தானன 
தனன தனதனா தனத்த தானன 
தனன தனதனா தனத்த தானன ...... தனதான 

குதலை மொழியினார் நிதிக்கொள் வாரணி 
முலையை விலைசெய்வார் தமக்கு மாமயல் 
கொடிது கொடிததால் வருத்த மாயுறு ...... துயராலே 

மதலை மறுகிவா லிபத்தி லேவெகு 
பதகர் கொடியவா ளிடத்தி லேமிக 
வறுமை புகல்வதே யெனக்கு மோஇனி ...... முடியாதே 

முதல வரிவிலோ டெதிர்த்த சூருடல் 
மடிய அயிலையே விடுத்த வாகரு 
முகிலை யனையதா நிறத்த மால்திரு ...... மருகோனே 

கதலி கமுகுசூழ் வயற்கு ளேயளி 
யிசையை முரலமா வறத்தில் மீறிய 
கழுகு மலைமகா நகர்க்குள் மேவிய ...... பெருமாளே. 
பாடல் 633 
தனதன தத்தத் தனத்த தானன 
தனதன தத்தத் தனத்த தானன 
தனதன தத்தத் தனத்த தானன ...... தனதான 

முலையை மறைத்துத் திறப்ப ராடையை 
நெகிழ வுடுத்துப் படுப்பர் வாயிதழ் 
முறைமுறை முத்திக் கொடுப்பர் பூமல ...... ரணைமீதே 

அலைகுலை யக்கொட் டணைப்ப ராடவர் 
மனவலி யைத்தட் டழிப்பர் மால்பெரி 
தவர்பொரு ளைக்கைப் பறிப்பர் வேசைக ...... ளுறவாமோ 

தலைமுடி பத்துத் தெறித்து ராவண 
னுடல்தொளை பட்டுத் துடிக்க வேயொரு 
தநுவை வளைத்துத் தொடுத்த வாளியன் ...... மருகோனே 

கலைமதி யப்புத் தரித்த வேணிய 
ருதவிய வெற்றித் திருக்கை வேலவ 
கழுகு மலைக்குட் சிறக்க மேவிய ...... பெருமாளே. 
பாடல் 634 
தாந்த தனன தனன தாந்த தனன தனன 
தாந்த தனன தனனந் ...... தனதான 

கோங்க முநகுயு மெலிய வீங்கு புளக களப 
மேந்து குவடு குழையும் ...... படிகாதல் 

கூர்ந்து குழையை அமளி தோய்ந்து குலவு மினிய 
தேங்கு கலவி யமுதுண் ...... டியல்மாதர் 

வாங்கு பகழி விழியை மோந்து பகலு மிரவும் 
வாய்ந்த துயிலை மிகவுந் ...... தணியாத 

வாஞ்சை யுடைய அடிமை நீண்ட பிறவி யலையை 
நீந்தி அமல அடிவந் ...... தடைவேனோ 

ஓங்க லனைய பெரிய சோங்கு தகர மகர 
மோங்கு ததியின் முழுகும் ...... பொருசூரும் 

ஓய்ந்து பிரமன் வெருவ வாய்ந்த குருகு மலையில் 
ஊர்ந்து மயில துலவுந் ...... தனிவேலா 

வேங்கை யடவி மறவர் ஏங்க வனிதை யுருக 
வேங்கை வடிவு மருவுங் ...... குமரேசா 

வேண்டு மடியர் புலவர் வேண்ட அரிய பொருளை 
வேண்டு மளவி லுதவும் ...... பெருமாளே.