திருப்படிக்கரை

பாடல் 787
தனத்த தத்தனத் தனத்த தத்தனத் 
தனத்த தத்தனத் ...... தனதான 

அருக்கி மெத்தெனச் சிரித்து மைக்கணிட் 
டழைத்தி தப்தடச் ...... சிலகூறி 

அரைப்ப ணத்தைவிற் றுடுத்த பட்டவிழ்த் 
தணைத்தி தழ்க்கொடுத் ...... தநுராகத் 

துருக்கி மட்டறப் பொருட்ப றிப்பவர்க் 
குளக்க ருத்தினற் ...... ப்ரமைகூரா 

துரைத்து செய்ப்பதித் தலத்தி னைத்துதித் 
துனைத்தி ருப்புகழ்ப் ...... பகர்வேனோ 

தருக்கு மற்கடப் படைப்ப லத்தினிற் 
றடப்பொ ருப்பெடுத் ...... தணையாகச் 

சமுத்திர த்தினைக் குறுக்க டைத்ததிற் 
றரித்த ரக்கர்பொட் ...... டெழவேபோர் 

செருக்கு விக்ரமச் சரத்தை விட்டுறச் 
செயித்த வுத்தமத் ...... திருமாமன் 

திருத்த கப்பன்மெச் சொருத்த முத்தமிழ்த் 
திருப்ப டிக்கரைப் ...... பெருமாளே.